বাৰমুখীয়াৰ পৰা টকিঅ’লৈ লাভলিনাৰ দীঘলীয়া যাত্ৰা (দেৱজিৎ ফুকন)

তাৰ পাছত ঝাৰখণ্ড আৰু অসমৰ সোণাপুৰত হোৱা মোৱা থাই প্ৰতিযোগিতাত পদক লাভ কৰে৷ সেই বছৰেই সৰুপথাৰলৈ অহা ভাৰতীয় ক্ৰীড়া প্ৰাধিকৰণৰ এটা দলৰ সন্মুখত বৰপথাৰ ছোৱালী হাইস্কুলৰ শাৰীৰিক নিৰ্দেশক ভবানন্দ লাহনৰ তৎপৰতাত লাভলীনাই ক্ৰীড়াশৈলী প্ৰদৰ্শন কৰে আৰু তিনিমাহৰ পাছত হঠাৎ খবৰ আহে পৰৱতীৰ্ দিনা গুৱাহাটীৰ ছাই কেন্দ্ৰত যোগদান কৰিবৰ বাবে৷ সেয়াই আৰম্ভণি৷ পূৰ্বতে উল্লেখ কৰা ধৰণৰ এক বেদনাদায়ক ৰেল যাত্ৰাৰে লাভলিনাৰ ক্ৰীড়া জীৱন মোৱা থাইৰ পৰা বক্সিঙলৈ উত্তৰণ ঘটে৷ বিগত এটা দশক লাভলিনাৰ বাবে বক্সিঙেই যেন জীৱনৰ সকলো৷ অতি সীমিত সা–সুবিধাৰে লাভলিনাই এটা দশকৰ প্ৰচেষ্টাৰ অন্তত আজি অসমৰ প্ৰথমগৰাকী মহিলা হিচাপে অলিম্পিকত যোগদানৰ যোগ্যতা অৰ্জন কৰিছে৷ আমাৰ লগত হোৱা কথা–বতৰাত দেউতাক টিকেন বৰগোহাঁয়ে লাভলিনাৰ জীৱনৰ বিভিন্ন কাহিনী ব্যক্ত কৰিছিল৷

পোচাকৰ অভাৱৰ মাজতো সফলতা আঁজুৰি আনিছিল তাই ঃ

আৰ্থিক দৈনতাৰ মাজতো লাভলিনা কোনো দিনেই থমকি ৰোৱা নাছিল৷ দেউতাকে জানিবলৈ দিয়া অনুসৰি লাভলিনাই এবাৰ কলিকতাত ৰাষ্ট্ৰীয় পৰ্যায়ৰ প্ৰতিযোগিতাত যোগদান কৰিবলৈ যোৱাৰ সময়তে ৰিঙত নামিবলৈ এযোৰ পোচাকৰ অভাৱ হোৱাত অসমৰে এগৰাকী প্ৰতিযোগীক তেওঁৰ খেলৰ পোচাকযোৰ বিচাৰিছিল৷ কিন্তু লগৰ প্ৰতিযোগীগৰাকী প্ৰতিযোগিতাত পৰাজিত হোৱাৰ পাছত সেই পোচাকযোৰ লাভলিনাই বিচৰাৰ পাছতো নিদিছিল৷ যাৰ ফলত এগৰাকী জ্যেষ্ঠ খেলুৱৈৰ পৰা এযোৰ ডাঙৰ পোচাক লৈ সেই জলহু পোছাক পৰিধান কৰি পদক আঁজুৰি আনিছিল৷ সেই সময়ত লাভলিনাৰ বয়স আছিল মাথোঁ ১৫ বছৰ৷

ল’ৰাৰ কামতহে লাভলিনাৰ অধিক হেঁপাহ ঃ

সৰুৰে পৰা লাভলিনাই ল’ৰাৰ কাম–কাজবোৰ কৰিহে ভাল পায়৷ তিনিগৰাকী ছোৱালীৰে পৰিপূৰ্ণ পৰিয়ালটোত ঘৰখনৰ সকলো ল’ৰাৰ কাম লাভলিনাই কৰে৷ আনকি চুলিবোৰো সৰুৰে পৰা ল’ৰাৰ দৰে কাটি ৰাখে৷ হাফপেণ্ট, স্পৰ্টিং আৰু এটা টুপী পিন্ধি ঘৰৰ শাক–পাচলি বজাৰত বিক্ৰী কৰিবলৈ নিয়া লাভলিনাক আনকি বৰপথাৰ সাপ্তাহিক বজাৰত গ্ৰাহকসকলে ‘ভাইটি’ বুলিহে মাতিছিল৷ ঘৰৰ পিছফালে থকা পুখুৰীটো লাভলিনা আৰু দুই জ্যেষ্ঠ ভগ্নীয়ে নিজেই খান্দিছিল৷ তেনেদৰে ঘৰৰ সৰু চাহ বাগিচাখনো প্ৰাণ পাই উঠিছিল লাভলিনা আৰু দুই জ্যেষ্ঠ ভগ্নীৰ হাতত৷ ঘৰত সাঁচি পুলি ৰোৱা, চেগুণ পুলি ৰোৱাৰ পৰা আৰম্ভ কৰি অধিকাংশ কাম ছোৱালী তিনিজনীৰ দ্বাৰাই হৈছিল৷

মেখেলা–চাদৰ পিন্ধাৰ ভয়ত ছাইত যোগদান কৰিছিল লাভলিনাই ঃ

বৰপথাৰ ছোৱালী হাইস্কুলত ক্লাছ এইটলৈ পোৱাৰ পাছত ছোৱালীৰ বাবে মেখেলা–চাদৰ পিন্ধাটো বাধ্যতামূলক আছিল৷ লাভলিনাই তাইৰ বায়েকহঁতৰ ইউনিফৰ্মৰ মেখেলা–চাদৰ পিন্ধি স্কুললৈ যায়৷ কিন্তু বায়েকহঁততকৈ লাভলিনা বহুত ওখ৷ বৰ্তমান লাভলিনাৰ উচ্চতা পাঁচ ফুট এঘাৰ ইঞ্চি৷ গতিকে বায়েকহঁতৰ চাদৰ–মেখেলা পিন্ধিলে কলাফুল ওলাই থাকে৷ তদুপৰি লগৰ ছোৱালীবিলাক তাইতকৈ বহু চাপৰ৷ এনে অৱস্থাত লাভলিনাই বিদ্যালয়লৈ যাবলৈ মন নকৰা হ’ল আৰু ক্ৰমাৎ পঢ়া–শুনাৰ প্ৰতি ধাউতি কমি গ’ল৷ যাৰ ফলত ক্লাছ নাইনৰ বছৰেকীয়া পৰীক্ষাত লাভলিনা ‘ফেইল’ কৰি থাকিল৷ এনেকুৱা সময়তে ছাইৰ পৰা লাভলিনা নিৰ্বাচিত হোৱাৰ খবৰ আহিছিল৷ মাকে লাভলিনাক বুজাইছিল ছাইত যোগদান কৰিলে আৰু চাদৰ–মেখেলা পিন্ধি বৰপথাৰ ছোৱালী হাইস্কুললৈ যাব নালাগে৷ দেউতাকে জনোৱা মতে কেৱল চাদৰ–মেখেলা পিন্ধাৰ পৰাপৰিত্ৰাণ পোৱাৰ আশাতহে লাভলিনাই বক্সিঙৰ প্ৰশিক্ষণৰ কাৰণে ‘ছাই’ত যোগদান কৰিছিল৷ অৰ্থাৎ কেৱল চাদৰ–মেখেলা পিন্ধাৰ ভয়ত গৈ ছাই কেন্দ্ৰত যোগদান কৰা লাভলিনাই আজি অলিম্পিকলৈ ভাৰতবৰ্ষক প্ৰতিনিধিত্ব কৰিবলৈ সুবিধা পালে৷

প্ৰিয় গাহৰি মাংস ঃ

লাভলিনাই সকলো থলুৱা খাদ্য খাই ভাল পায় যদিও অধিক ভাল পায় গাহৰি মাংস খাই৷ বৰ্তমান ইটালীত প্ৰশিক্ষণ লৈ থকা লাভলিনাই সেই ঠাইত গাহৰি খবলৈ পোৱা নাই বুলি জনায়৷ বিগত বছৰ কৰ’নাৰ প্ৰথম লহৰৰ সময়ত ঘৰলৈ আহোঁতে লাভলিনাই লক্‌ডাউনত বিধবস্ত হোৱা লোকসকলৰ মাজত সাহায্য বিতৰণতো ব্যস্ত আছিল৷ তদুপৰি পথাৰত ধান ৰোৱাৰ পৰা আৰম্ভ কৰি এতিয়াও ঘৰলৈ আহোঁতে সকলো কাম–কাজতে জড়িত হয়৷

সফলতাৰ দীঘলীয়া তালিকা ঃ

লাভলিনা বৰগোহাঁয়ে ভাৰতীয় বক্সিং জগতলৈ আগবঢ়োৱা অৱদানৰ কাৰণেই ভাৰত চৰকাৰে লাভলিনালৈ আগবঢ়াইছে অতি সন্মানজনক ‘অৰ্জুন বঁটা’৷ ৰাষ্ট্ৰপতি ৰামনাথ কুবিনে লাভলিনাক এই বঁটা প্ৰদান কৰে৷ ২০১১ চনত হোৱা থাই প্ৰতিযোগিতাত ৰাষ্ট্ৰীয় পৰ্যায়ত সোণৰ পদক লাভ কৰাৰ পাছৰ পৰা যেন বিগত প্ৰায় এটা দশক লাভলিনাক সফলতাই খেদি ফুৰিছে৷ ৰাষ্ট্ৰীয় পৰ্যায়ত অগণন পদক লাভ কৰাৰ উপৰি ২০১৭ চনত এছিয়ান চেম্পিয়নশ্বিপত সোণৰ পদক, ২০১৮, ২০১৯ বৰ্ষত বিশ্ব বক্সিং প্ৰতিযোগিতাত ব্ৰঞ্জৰ পদক লাভ কৰে৷ ২০১৮ চনতে ইণ্ডিয়ান অপেন চেম্পিয়নশ্বিপত সোণৰ পদক পোৱা লাভলিনাই নিজৰ যোগ্যতাৰ বলতেই এইবাৰ অলিম্পিকত খেলাৰ সুযোগ লাভ কৰিছে৷ সকলোৰে আশা, এইবাৰ লাভলিনাই ভাৰতবৰ্ষলৈ অলিম্পিক পদক কঢ়িয়াই আনিব৷ নিশ্চিতভাৱে লাভলিনাৰ টকিঅ’ যাত্ৰা বহু পৰিমাণে কঠিন হ’ব, কিন্তু ই অসম্ভৱো নহ’ব৷

ইটালীত কঠোৰ অনুশীলন কৰাৰ অন্তত ভাৰতীয় দলটোৱে টকিঅ’ অলিম্পিকত নিজৰ প্ৰদৰ্শনৰ ধাৰা অব্যাহত ৰাখিছে৷ ইতিমধ্যেই লাভলিনাই প্ৰথমখন ‘বাই’ লাভ কৰি প্ৰী–কোৱাৰ্টাৰ ফাইনেলত জাৰ্মানীৰ লাডিনে এপেটজ্‌ক আৰু কোৱাৰ্টাৰ ফাইনেলত ছাইনিজ টাইপেই ছেন–নিয়েন শ্বীনক পৰাস্ত কৰি টকিঅ’ত সৱল উপস্থিতি সজোৰে ঘোষণা কৰি অসম তথা ভাৰতীয় ক্ৰিয়া জগতত এক ইতিহাস ৰচনা কৰিছে৷ ৬৯ কেজি শাখাত পৰৱতীৰ্ খেলৰ লাভলিনাৰ মূল প্ৰতিদ্বন্দী হ’ব তুৰ্কীৰ বুছেনাজ চুৰযেনেলি আৰু চীনৰ গু–হংগ৷ আমাৰ সকলোৰে আশা লাভলিনাৰ এই সোণসেৰীয়া যাত্ৰাই অলিম্পিকত পদক জয় কৰি প্ৰতিগৰাকী ভাৰতীয়ক গৌৰাৱান্বিত কৰিব৷ আমি লাভলিনালৈ আগবঢ়াইছো অফুৰন্ত শুভকামনা৷