অপৰাধৰ সৈতে কিদৰে পৰিচয় হয় শিশু-কিশোৰৰ (নিমানন্দ দাস)

শিশুৰ দ্বাৰা সংঘটিত বিগত চাৰিটা দশকৰ নেশ্যনেল ক্ৰাইম ৰেকৰ্ডছ ব্যুৰোৰ কেছ ডায়েৰীৰ সমীক্ষা যদি কৰা হয় তেন্তে দেখা যাব যে অলপতে নগাঁৱত সংঘটিত পৰ্ণফিল্ম চাবলৈ অমান্তি হোৱা বাবে এগৰাকী ছবছৰীয়া শিশুক সপ্তম-অষ্টম শ্ৰেণীত পঢ়া দুটা ল’ৰাই মৰিয়াই মাৰি পেলোৱা হৃদয় বিদাৰক ঘটনাটোৱে ছাগৈ শিশুৰ দ্বাৰা সংঘটিত ভয়ংকৰ অপৰাধ প্ৰণৱতাৰ চৰম সীমা চেৰাই গৈছে৷ ঠিক তেনেদৰে গহপুৰ আৰু সৰভোগত কিছুদিন আগতে কিশোৰৰ দ্বাৰা সংঘটিত দুটা সুকীয়া শিশু অপৰাধৰ ঘটনা উনুকিয়াব পাৰি৷ গহপুৰত সংঘটিত ঘটনাটো আছিল কেইগৰাকীমান নৱম শ্ৰেণীত পঢ়া ছাত্ৰই সপ্তম শ্ৰেণীত পঢ়া সহপাঠী ছাত্ৰীক ঘৰত কোনো নথকাৰ সুযোগ লৈ হাবিলৈ মাতি নি দলবদ্ধ ধৰ্ষণ কৰিছিল৷ এইটো আছিল নগৰৰ সীমামূৰীয়া অৰ্দ্ধগাঁৱ- অৰ্দ্ধ নগৰৰ নিচিনা অঞ্চলৰ জনজাতীয় সমাজত সংঘটিত ঘটনা৷ সৰভোগত সংঘটিত ঘটনাটো আছিল কেইগৰাকীমান দশম শ্ৰেণীত পঢ়ি থকা ল’ৰাই লগৰীয়া এজনক মৰিয়াই হত্যা কৰিছিল৷ দোষটো কি আছিল জানেনে? দোষটো আছিল ল’ৰাজনে সমনীয়া লগৰীয়া এজনে ছোৱালী এজনীক ভালপোৱা কথাটো ছোৱালীজনীৰ অভিভাৱকক কৈছিল৷
এতিয়া ওপৰোক্ত শিশুৰ দ্বাৰা সংঘটিত অপৰাধমূলক ঘটনাকেইটা পৰ্যালোচনা কৰিলে দেখা যায় যে নগৰ অঞ্চলতে নহয় গাঁও অঞ্চলতো শিশু-কিশোৰৰ মাজত অপৰাধ প্ৰৱণতা বৃদ্ধি পাইছে৷ কিশোৰৰ মাজত বিশেষকৈ যৌনকেন্দ্ৰিক ধৰ্ষণ, হত্যা আদি ঘটনা সংঘটিত হোৱাটো অস্বাভাৱিক তথা আ(ৰ্যজনক৷ এনে ঘটনা ভাৰতবৰ্ষৰ বিভিন্ন নগৰ-চহৰতে নহয় গাঁও অঞ্চলতো কিশোৰ- শিশুৰ মাজত অপৰাধ প্ৰৱণতা বৃদ্ধি পোৱাটো কাকতালীয়, দুই এটা বিক্ষিপ্ত ঘটনা নহয়৷ এইটো পৰিৱৰ্তিত সমাজ ব্যৱস্থা ভয়াবহভাৱে ৰুগ্ন হৈ উঠাৰ ইংগিত দিছে৷ মানসিকভাবে এনে ৰুগ্ন শিশু-কিশোৰ-যুৱকৰ দ্বাৰা শ্বাসৰুদ্ধকৰ, হৃদয়বিদাৰক আৰু কিছুমান ভয়ংকৰ ঘটনাৰ সন্মুখীন হোৱা পৰিস্থিতিৰ সৃষ্টি হোৱাটো ধুৰূপ৷ গতিকে শিশু-কিশোৰৰ মাজত অপৰাধ প্ৰৱণতা ৰোধ কৰিবলৈ সমাজ, অভিভাৱক তথা চৰকাৰ সচেতন আৰু চিৰিয়াছ হ’বৰ হ’ল৷ প্ৰথমতে পৰ্যালোচনা কৰিবলগীয়া বিষয় হৈছে কিশোৰৰ মাজত যৌন আকাংক্ষা তথা ধৰ্ষণ প্ৰৱণতা সৃষ্টি হ’ল কেনেকৈ? কিশোৰসকলে এণ্ড্ৰয়ড মোবাইলত পৰ্ণ’ চিনেমা চাবলৈ পায় কেনেকৈ৷ ইয়াৰ বাবে দায়ী অভিভাৱক৷ সৰু ল’ৰা-ছোৱালীয়ে এণ্ড্ৰয়ড মোবাইলত ইউটিউৱ, ফেচবুক, হোৱাটছএপ্‌, গুগুল আদি অবাধ গতিত চাওঁতে বহু অভিভাৱকে মন নকৰে৷ বহু অভিভাৱকে ল’ৰা-ছোৱালীৰ আমনিৰ পৰা ৰক্ষা পাবলৈ, ভাত খুৱাবলৈ এণ্ড্ৰয়ড মোবাইলটোত গেম, কাৰ্টুন চাবলৈ দিয়ে৷ এণ্ড্ৰয়ড মোবাইলৰ প্ৰতি ল’ৰা-ছোৱালীৰ আসক্তি এনেদৰে বৃদ্ধি পায়৷