অনুভৱৰ খিৰিকিয়েদি বাঃৰে বাঃৰে বাঃ কি যে আনন্দ… পালোঁ গৰম বন্ধ (ৰঞ্জন শৰ্মা)

নাই আজি সেই দিন নাই৷ সেই দিনবোৰ যেন এতিয়া সাধুকথা হ’ল৷ গৰমৰ বন্ধ একেই আছে৷ মাথোঁ সলনি হৈছে ইয়াৰ মাদকতা৷ আজিৰ ল’ৰা-ছোৱালীয়ে জানো সেই মাদকতা পায়? চাকৰিৰ সংক্ৰান্তত গাঁৱৰ পৰা আহি চহৰত বাস কৰা কিমানজনে নো গৰমৰ বন্ধত নিজৰ সন্তানক গাঁৱৰ সেউজ পৰিৱেশৰ মাজলৈ লৈ যায়? মাক-দেউতাকৰ লগত দীঘলীয়াকৈ আত্মীয়ৰ ঘৰত আলহী হয়গৈ? অৱশ্যে আজিকালি সকলো নিজক নিজক লৈ ব্যস্ত, আত্মীয় সকলেও চাগৈ ইমান দীঘলীয়াকৈ আলহী নিবিচাৰে…৷ সঁচাকৈয়ে, তাহানিৰ গৰম বন্ধ আৰু এতিয়াৰ গৰম বন্ধৰ মাজত এক বৃহৎ পাৰ্থক্য আহি পৰিছে৷ অৱশ্যে এইয়া সময়ৰ পৰিৱৰ্তন৷ মানি ল’বই লাগিব জীৱন বিকাশৰ বাবে সেইয়া গ্ৰহণযোগ্য হৈছে আমাৰ বাবে৷ কেৱল গৰম বন্ধৰ দিনকেইটাৰ বাহিৰে ল’ৰা-ছোৱালীয়ে আন সময়ত মুক্ত মনে খেলা-ধুলা কৰিবলৈ, নিজৰ মতে থাকিবলৈ, ফুৰিবলৈ সময় নাপায়৷ কাৰণ এতিয়া পঢ়াৰ বোজা অত্যন্ত বেছি৷ আজিকালি ছাত্ৰ-ছাত্ৰীয়ে বিচাৰিলেও হয়তো তেনে কৰিব নোৱাৰে৷ যদিও পঢ়া-শুনাত বেছি সময় দিব লাগে তথাপিও কওঁ দৈনন্দিন ব্যস্ততা আৰু যান্ত্ৰিকতাৰ পৰা মুক্ত হৈ নিজৰ সন্তানক এই গ্ৰীষ্মৰ বন্ধতে কিছু সময় দিয়ক৷ কৃত্ৰিম পৃথিৱীখনৰ পৰা অকণমান সময় উলিয়াই আনি সিহঁতক প্ৰকৃতিৰ জগতখনৰ সৈতে চিনাকি কৰাই দিয়ক৷ কিছু পৰিমাণে হ’লেও প্ৰকৃতিৰ গছ-গছনি, চৰাই-চিৰিকতিৰ সৈতে চিনাকি কৰাই দিয়ক৷ পোহনীয়া জীৱ-জন্তু, প্ৰকৃতিৰ সৈতে সম্পৰ্ক গঢ়িবলৈ দিয়ক৷ সমনীয়াৰ সৈতে কিছু সময় মুকলিকৈ খেলিবলৈ দিয়ক, নিজ আত্মীয়সকল আৰু চুবুৰীয়াৰ সৈতে এক আত্মিক সম্পৰ্ক ৰক্ষা কৰিবলৈ দিয়ক৷ চৌব্বিশ ঘণ্টাই পাই থকা কম্পিউটাৰ, টিভি, মোবাইল, ভিডিঅ’ গেম আদিৰ পৰিৱৰ্তে অন্ততঃ এই গৰম বন্ধৰ দিনকেইটাত সন্তানক সমনীয়াৰ সৈতে খেলিবলৈ দিয়ক, সাধু কথা শুনাওক বা সাধু কথাৰ কিতাপ পঢ়াৰ আনন্দ ল’বলৈ দিয়ক৷ ওচৰতে অনুষ্ঠিত হৈ থকা নৃত্য, গীত, চিত্ৰকলা, অভিনয়ৰ কৰ্মশালাত তেওঁলোকক অন্তভুৰ্ক্ত কৰি আমাৰ কৃষ্টি-সংস্কৃতিক জানিবলৈ-বুজিবলৈ সুবিধা দিয়ক৷ এইয়া মাথো সন্মানীয় অভিভাৱক সকললৈ আমাৰ মাথোঁ এটি বিনম্ৰ অনুৰোধহে৷ চাব, তেওঁলোকৰ ভাল হ’ব৷ এনেসমূহ কামৰ দ্বাৰা তেওঁলোকৰ অলপ হ’লেও শিক্ষা লাভ হ’ব৷ মনত ৰাখিব, দিন কাল একে আছে, প্ৰকৃতিয়েও একে ধৰণেৰেই কাম কৰি আছে, গৰম বন্ধও আগৰ দৰেই আহি আছে, কেৱল আমাৰ যেন মানসিকতাৰহে কিছু পৰিৱৰ্তন হৈছে৷ গতিকে এই গৰম বন্ধৰ দিন কেইটাতে ল’ৰা-ছোৱলীক আত্মীয়ৰ লগত, সমনীয়াৰ লগত সংযোগ কৰি তেওঁলোকৰ মনত সন্মান, শ্ৰদ্ধা, মৰম-স্নেহ আদি মানবীয় গুণৰ প্ৰকাশ ঘটাওক যাতে ডাঙৰ হ’লে তেওঁলোকেও শৈশৱৰ কথা গৌৰৱেৰে আনৰ আগত প্ৰকাশ কৰিব পাৰে৷ গৰম বন্ধ আনন্দময় হওক৷