গৰ্ভৱতী মহিলাৰ স্বাস্থ্যৰ যত্ন আৰু

গৰ্ভাৱস্থাৰ সময়ছোৱা গৰ্ভৱতী মহিলা আৰু গৰ্ভস্থ সন্তান দুয়োৰে বাবে অতি মূল্যবান৷ গৰ্ভস্থ শিশুৰ স্বাস্থ্য আৰু ভৱিষ্যত জীৱনৰ মুল ভেটিটো এইখিনি সময়তে গঢ় লয়৷ স্বাস্থ্যৱতী মহিলাই এটি স্বাস্থ্যৱান শিশুৰ জন্ম দিব পাৰে৷ সেয়েহে এইখিনি সময়ত মহিলাগৰাকীৰ স্বাস্থ্যৰ বিশেষ যত্ন লোৱাটো অতি প্ৰয়োজনীয়৷ তদুপৰি জন্মৰ পিছতো কিছুদিনলৈ শিশু সম্পূৰ্ণৰূপে মাকৰ ওপৰত নিৰ্ভৰ কৰিবলগীয়া হয়৷ শিশুয়ে মাতৃ দুগ্ধপান কৰা সময়তো মাকে স্বাস্থ্যৰ যত্ন লোৱাটো অতি প্ৰয়োজনীয়৷ এইখিনি সময়তো মাকৰ স্বাস্থ্য বেয়া হলে তাৰ বিৰূ¸প প্ৰভাৱ শিশুৰ ওপৰত পোনপটীয়াকৈ পৰে৷ সেয়েহে পৰিয়ালৰ লোকে বিশেষ যত্ন লোৱাটো অতি প্ৰয়োজনীয়৷

  গৰ্ভাৱস্থাৰ সময়ছোৱাত দেখা দিয়া প্ৰধান সমস্যাসমূহ এনেধৰণৰ:

 গ্ধ অপুষ্টিঃ অপুষ্টি গৰ্ভৱতী মহিলাৰ অন্যতম প্ৰধান সমস্যা আৰু অনাগত সময়ত হ’ব পৰা বিভিন্ন সমস্যাৰ কাৰক হিচাপে পৰিগণিত হয়৷ গৰ্ভধাৰণ কাল আৰু শিশুক দুগ্ধপান কৰোৱা সময়ত অধিক পুষ্টি আৰু কেল’ৰিৰ প্ৰয়োজন হয়৷ শিক্ষিত আৰু আৰ্থিক ভাবে উন্নত সমাজৰ মহিলাসকলৰ মাজত এই সমস্যা কমকৈ হয়৷ বৰ্তমান সময়ত চৰকাৰে গৰ্ভৱতী তথা দুগ্ধপান কৰোৱা মহিলাৰ পুষ্টিৰ বাবে বিভিন্ন আঁচনি আৰু সজাগতামূলক কাৰ্যসূচী গ্ৰহণ কৰিছে৷ গৰ্ভৱতী মহিলাই পুষ্টিকৰ খাদ্য কিয় খাব লাগে, কি কি খাদ্য খাব লাগে আৰু কিমান খাব লাগে এইবোৰৰ বিষয়ে গৰ্ভৱতী মহিলাগৰাকী আৰু পৰিয়ালৰ লোকসকল জ্ঞাত হোৱা উচিত৷ গৰ্ভাৱস্থাত প্ৰয়োজনীয় পুষ্টি লাভ নকৰিলে ৰক্তহীনতা, নৱজাতকৰ ওজন কম হোৱা আৰু বিভিন্ন জটিলতা হ’ব পাৰে৷ কিছুমান ক্ষেত্ৰত নবজাতক বা প্ৰসূতিৰ মৃত্যুও হয়৷ আমাৰ ভাৰতবৰ্ষৰ দৰে উন্নয়নশীল দেশত পুষ্টিহীনতাৰ সমস্যাত ভোগা লোকৰ সংখ্যা অধিক৷ প্ৰসূতি আৰু নৱজাতকৰ মৃত্যুৰ হাৰো অধিক হয়৷ গৰ্ভাৱস্থাত মাকজনী পুষ্টিৰ অভাৱত ভূগিলে নৱজাতকৰ ওজন কম হয়৷ ওজন কম শিশুৰ ৰোগ প্ৰতিৰোধ ক্ষমতা দুৰ্বল হয়৷ ফলত সাধাৰণ ৰোগতে এনে নৱজাতকৰ মৃত্যু হ’ব পাৰে৷

  এটি শিশুক জন্মৰ পৰা ছয়মাহ বয়সলৈ কেৱল মাতৃ দুগ্ধপান কৰোৱাবলৈ পৰামৰ্শ দিয়া হয়৷ এইখিনি সময়ত মাকৰ খোৱা–বোৱা ভাল নহ’লে প্ৰয়োজনীয় দুগ্ধ শিশুটোৱে খাবলৈ নাপাব পাৰে৷ ফলত¸ শিশুৰ বৃদ্ধি বাধাগ্ৰস্ত হয়৷ ঠিক সেইদৰে শিশুক গোটা আহাৰ খুৱাবৰ সময়তো যথেষ্ট সাৱধানতা অবলম্বন কৰিব লাগে৷ শিশুৱে সহজতে হজম কৰিব পৰা পুষ্টিকৰ আহাৰ দিনত ৩–৪ বাৰ খুৱাব লাগে৷ গুৰুপাক খাদ্য একেবাৰে দিব নালাগে৷ খোৱাত অনিয়ম হলে পেটৰ অসুখ, ডায়েৰীয়া আদি হ’ব পাৰে৷

 গৰ্ভাৱস্থাত তেজত পানীৰ পৰিমাণ বাঢ়ে আৰু ৰক্তকণিকাৰ পৰিমাণ কমি যায়৷ শৰীৰত আইৰনৰ মাত্ৰাও কমে৷

ফলত স্বাভাৱিকতে কিছু পৰিমাণে ৰক্তহীনতা হয়৷ এইখিনি সময়ত পুষ্টিকৰ খাদ্য ভালদৰে নাপালে ৰক্তহীনতা বাঢ়ি যায় আৰু গুৰুতৰ সমস্যা সৃষ্টি কৰে৷ গৰ্ভধাৰণৰ সময়ছোৱাত পুষ্টিকৰ খোৱা খাদ্যৰ উপৰিও আইৰন আৰু ফ’লিক এচিডৰ বড়ী নিয়মীয়াকৈ সেৱন কৰা উচিত৷ প্ৰসৱৰ সময়তো বহু পৰিমাণে ৰক্তক্ষৰণ হয়৷ সেয়েহে আইৰন আৰু ফ’লিক এচিডৰ বড়ি প্ৰসৱৰ পিছতো কিছু দিনলৈ খোৱা উচিত৷ স্তনপানৰ সময়চোৱাত মাকৰ শৰীৰত কেলছিয়ামৰ অভাৱ হয়৷ মাতৃদুগ্ধৰ লগত বহু পৰিমাণৰ কেলছিয়াম শৰীৰৰ পৰা ওলাই যায়৷ স্তনপান কৰোৱা সময়খিনিত মহিলাগৰাকীয়ে কেলছিয়ামৰ বড়ি নিয়মীয়াকৈ খাব লাগে৷ গৰ্ভস্থ শিশুৰ শাৰীৰিক আৰু মানসিক বিকাশৰ বাবেও কেলছিয়াম অতি প্ৰয়োজনীয়৷

 গৰ্ভাৱস্থাৰ সময়ছোৱাত বিভিন্ন সংক্ৰামক ৰোগ হ’ব পাৰে আৰু ইয়াৰ পৰা গৰ্ভস্থ সন্তানৰ ক্ষতি হ’ব পাৰে৷ ভ্ৰুণ এটা মাতৃ গৰ্ভত স্থিতি লোৱাৰ লগে লগে মাকৰ শৰীৰৰ ৰোগ প্ৰতিৰোধ ক্ষমতা স্বাভাৱিকতে কমি যায়৷ এই সময়ত বিভিন্ন সংক্ৰামক ৰোগ হোৱাৰ সম্ভাৱনা বাঢ়ি যায়৷ গৰ্ভাৱস্থাত স্ত্ৰী অংগ ভালদৰে পৰিষ্কাৰ কৰি নাৰাখিলে মুত্ৰনলীৰ সংক্ৰমণ হ’ব পাৰে৷ সংক্ৰমণৰ বাবে গৰ্ভপাত, শিশুৰ জন্মগত বিসংগতি, ওজন কম থকা শিশুৰ জন্ম হোৱা আদি সমস্যা হ’ব পাৰে৷ এইখিনি সময়ত পৰিস্কাৰ–পৰি২৬ন্ন হৈ থকাটো অতি প্ৰয়োজনীয়৷ কিবা সংক্ৰামক ৰোগ হলে সোনকালে ডাক্তৰৰ পৰামৰ্শ লোৱা উচিত৷

 সঘনাই গৰ্ভধাৰণ কৰিলেও শিশু আৰু মাকৰ বিভিন্ন সমস্যা হ’ব পাৰে৷ আমাৰ দেশত জন্মৰ হাৰ অধিক৷ সঘনাই গৰ্ভধাৰণ কৰিলে মাকৰ স্বাস্থ্যৰ বহুত ক্ষতি হয়৷ ইয়াৰ ফলত গৰ্ভপাত, দুৰ্বল শিশুৰ জন্ম হয়৷ ঠিক তেনেদৰে কম বয়সতে মাতৃত্ব লাভ কৰিলেও মাক আৰু শিশুৰ স্বাস্থ্য বেয়া হ’ব পাৰে৷ আমাৰ দেশত কম বয়সত মাক হোৱা মহিলাৰ সংখ্যা বহুত৷ এইবোৰ কাৰণতেই প্ৰসূতি আৰু নৱজাতকৰ মৃত্যুৰ হাৰ আমাৰ দেশত আধিক৷