আমেৰিকাৰ ডায়েৰী

আজি যিটো বিষয়ৰ ওপৰত লিখিব লৈছোঁ, এই বিষয়ে মোৰ জ্ঞান তেনেই নগণ্য৷ তথাপি বুকুত অলপ সাহস গোটাই নিজৰ ক্ষুদ্ৰ অনুভৱখিনি আগবঢ়াইছোঁ৷

স্বাধীনতা শব্দটোৰ প্ৰকৃত অৰ্থ পৰাধীন লোকসকলেহে ভালকৈ ব্যক্ত কৰিব পাৰিব৷ মোৰ এখন স্বাধীন  ৰাষ্ট্ৰত জন্ম যদিও স্বাধীনতা দিৱস এদিনো উলহ–মালহেৰে উদযাপন কৰি নাপালোঁ৷ মোৰ সৰুকালৰ এটা কথাই মনত আছে, আমাৰ ভাড়াঘৰত প্ৰাপ্তবয়স্ক  শিক্ষাৰ কাৰ্যালয় এটা আছিল তাৰে ৪ জন কৰ্মচাৰীৰ সৈতে বিষয়াজনে ৰাতিপুৱাই জাতীয় পতাকা উত্তোলন  কৰে আৰু আমি সকলোৱে ৰাষ্ট্ৰীয় সংগীত পৰিবেশন কৰোঁ৷ তাৰপাছত সকলোৱে মিলি মিঠাই খাওঁ৷ পতাকাখন উত্তোলন কৰাৰ পাছত চোতালত পৰি ৰোৱা ফুলখিনি বুটলাও আন এটা স্ফুৰ্তি মোৰ৷ এইয়াই হৈছে মোৰ বাবে স্বাধীনতা দিৱস৷ এটা সময়ত কাৰ্যালয়টো আমাৰ ঘৰৰ পৰা গ’লগৈ তাৰ পাছত মোৰ বাবে ১৫আগষ্ট আৰু ২৬ জানুৱাৰী আমাৰ  অসম  ৰাজ্যখনৰ বাবে চাৰিওফালে বন্ধ মাথোঁ৷ যি দুই এঠাইত উদ্‌যাপন কৰে তাকো সম্পূৰ্ণ কটকটীয়া সুৰক্ষা বেষ্টনীৰ মাজত৷ অবশেষত টিভিৰ মাজৰ দিনটো পাৰ কৰা হয়৷

আমেৰিকালৈ আহি স্বাধীনতা দিৱসৰ আচল আমেজ উপভোগ কৰিব পাৰিলোঁ৷ ১৭৭৬ চনৰ জুলাই ৪ তাৰিখে ব্ৰিটিছ যুক্তৰাষ্ট্ৰৰ পৰা আমেৰিকা যুক্তৰাষ্ট্ৰই স্বাধীনতা লাভ কৰে৷ তেতিয়াৰ পৰাই আমেৰিকাবাসীয়ে প্ৰত্যেক বছৰে জুলাই মাহৰ ৪ তাৰিখে স্বাধীনতা দিৱস অতি উলহ–মালহেৰে উদ্‌যাপন কৰি আছে৷ এই বছৰ মোৰো ভাগ্যত মিলিল স্বাধীনতা দিৱসৰ বিভিন্ন অনুষ্ঠানত ভাগ লোৱাৰ৷

জুলাই মাহৰ প্ৰথম সপ্তাহটো আমেৰিকাত উৎসৱমুখৰ পৰিৱেশ এটা হৈ থাকে৷ ৰাতি হ’লেই ফটকাৰ শব্দ৷ ফটকা কিন্তু কিছুমান নিৰ্দিষ্ট স্থানত, নিৰ্দিষ্ট সময়ৰ বাবেহে ফুটায়৷ যধে–মধে ৰাস্তাই ঘাটে ফটকা ফুটাই নুফুৰে৷ মানুহখিনি যথেষ্ট সমাজ সচেতন তথা এক কথাত ক’বলৈ হ’লে জ্ঞানী৷ মানুহৰ অহা–যোৱা কৰাত বা পঢ়া শুনা কৰাত বা কাৰোবাৰ ঘৰত যদি কোনোবা ৰুগীয়া মানুহ আছে তেওঁলোকৰো সুবিধা–অসুবিধাৰ প্ৰতি লক্ষ্য ৰাখি আছুতীয়াকৈ থকা নিৰ্দিষ্ট স্থান নহ’লে খেলপথাৰত কিছু সময়ৰ বাবে আতচবাজী কৰে৷

স্বাধীনতা দিৱসৰ আগদিনা অৰ্থাৎ জুলাইৰ×৩ তাৰিখে ৰাতি ১০টা মানত আমি ওলাইছিলোঁ পেৰেড হ’বলগীয়া স্থানটি চাবলৈ৷ মই ভাবিছিলোঁ, আমাৰ দেশৰ দৰে সম্পূৰ্ণ সুৰক্ষা বেষ্টনীৰ মাজত পেৰেড হোৱা স্থানটো আছে৷ কিন্তু তাৰ একেবাৰে ওলোটা ছবি এখনহে দেখিবলৈ পালোঁ৷ মাথোঁ ৰাস্তাৰ কাষত ফলক দুখন মানত জাননী জাৰি কৰিছে যে দুটা ৰাস্তা ৪ তাৰিখে পুৱা জ্ঝ–১২ টা লৈকে গাড়.ী অহা–যোৱা বন্ধ৷ কাৰণ সেই পথেদি পেৰেড পাৰ হৈ যাব৷ আমি থকা ঠাইখিনিত হোৱা পেৰেড আমাৰ দেশৰ শোভাযাত্ৰাৰ দৰে৷ গতিকে পেৰেড পাৰহৈ যোৱা সময়খিনি ৰাস্তাটো বন্ধ কৰি দিয়ে৷ যাতে পেৰেড সুকলমে পাৰ হৈ যায়৷ ৪ জুলাইৰ বাবে বহুতখিনি প্ৰশাসনেও প্ৰস্তুতি চলাবলগীয়া হয়৷ নিয়মানুবৰ্তিতা আৰু সময়ানুবৰ্তিতাৰ প্ৰতি ৰাইজ নিজেই সচেতন৷ গতিকে এইক্ষেত্ৰত বিশেষ একো পদক্ষেপ ল’বলগীয়া নহয়৷ কিন্তু পৰিৱেশটো যাতে লেতেৰা নহয় তাৰ বাবে প্ৰশাসনে ঠায়ে ঠায়ে ডাষ্টবিন আৰু অস্থায়ী শৌচাগাৰৰ ব্যৱস্থা কৰি দিয়ে৷ আগদিনাই বহুত মানুহে পেৰেড হ’বলগীয়া ৰাস্তাটোৰ দুইকাষে ¸বিছনা চাদৰ সদৃশ কাপোৰ পাৰি থৈ আহে৷ কিছুমানে আকৌ আগদিনাই চকীও থৈ আহে৷ এইবোৰ দেখি বিহু সন্মিলন চাবলৈ যোৱাৰ কথা মনলৈ আহিল৷ আগতে যোৱা সকলে নিজৰ আত্মীয়–স্বজন বা বন্ধু–বান্ধবীলৈ বেগ, ৰুমাল আদি থৈ চকী দখল কৰা কামটোলৈ মনত পৰি গ’ল৷