আন্তৰ্জাতিক নাৰী দিৱস আৰু ইয়াৰ প্ৰাসংগিকতা (জিনা বৰা)

অতীজতে নাৰীৰ জীৱন সন্তান জন্ম দি লালন–পালন কৰা আৰু ঘৰুৱা কাম–কাজ কৰাৰ বাবে ঘৰৰ চাৰি বেৰৰ মাজতে সীমাৱদ্ধ আছিল৷ সময় বাগৰাৰ লগে লগে সেই সীমাৱদ্ধতা অতিক্ৰম কৰি লাহে লাহে প্ৰগতিৰ জখলাত নাৰীসকল আগবাঢ়ি যাবলৈ ধৰিলে৷ উচ্চ শিক্ষাৰে শিক্ষিত হৈ আজিৰ স্বাধীনচিতীয়া, সাহসী আৰু উপাৰ্জনশীল নাৰীয়ে বিভিন্ন কাম–কাজত নিজকে নিয়োজিত কৰিছে৷ আজিৰ নাৰীয়ে দেশ চলাইছে, বিমান চলাইছে, মহাকাশলৈ গৈছে, দেশৰ হকে যুদ্ধ কৰিছে, ব্যৱসায়–বাণিজ্য কৰিছে, ক্ৰীড়াৰ ক্ষেত্ৰত নানা চমক দেখুৱাইছে, উচ্চ পদস্থ প্ৰশাসনিক বিষয়া হৈ দক্ষতাৰ পৰিচয় দিছে, সাহিত্য–সংস্কৃতিৰ ক্ষেত্ৰখনলৈ অনবদ্য অৱদান আগবঢ়াইছে৷ মুঠতে কোনো ক্ষেত্ৰতে আজিৰ নাৰী পুৰুষতকৈ পিছপৰি থকা নাই৷  শাৰীৰিকভাৱে সমকক্ষ নহলেও মানসিক জোখৰ তুলাচনীত নাৰীৰ ওজন পুৰুষতকৈ কোনোগুণে কম নহয়৷

   সফলতাৰ উচ্চ শিখৰত যিমান দূৰেই আৰোহণ নকৰক কিয় ভালকৈ অনুধাৱন কৰিলে দেখা যায় ই এখন আধৰুৱা ছবিহে৷ কিয়নো সৰহসংখ্যক মহিলা এতিয়াও নিৰক্ষৰ আৰু নিৰ্যাতিত হৈয়ে জীৱন নিৰ্বাহ কৰি আছে৷ বিশ্বৰ বিভিন্ন পুৰুষতান্ত্ৰিক সমাজ ব্যৱস্থাত আজিও নাৰীক যৌন সুখ–সম্ভোগ, সন্তান জন্ম দিয়াৰ আহিলা হিচাপে গণ্য কৰা হয়৷ তদুপৰি বলাৎকাৰ, যৌতুকৰ নামত শাৰীৰিক–মানসিক অত্যাচাৰ আদিবোৰ চলিয়েই আছে৷ বিভিন্ন আইন–আঁচনি আদি ৰূপায়ণ হৈছে যদিও, সম–অধিকাৰৰ দোহাই দি প্ৰকৃতাৰ্থত পুৰুষৰ সমানে নাৰীক মৰ্যাদা প্ৰদান কৰিবলৈ আজিৰ সমাজ সক্ষম হ’ব পৰা নাই৷ যাৰ বাবে সমগ্ৰ নাৰী জাতিয়ে উচিত মৰ্যাদা পাবৰ বাবে, নাৰী মুক্তিৰ বাবে সংগ্ৰাম কৰিব লগা হৈছে৷ বছৰৰ ৮ মাৰ্চৰ দিনটো বিশ্বৰ শোষিত নাৰী সমাজৰ মুক্তি সংগ্ৰামক সবল কৰি তোলাৰ উদ্দেশ্যে সমগ্ৰ বিশ্বজুৰি আন্তৰ্জাতিক নাৰী দিৱস হিচাপে পালন কৰা হয়৷ এই দিৱসটো পালনৰ আঁৰত কাৰখানাত কৰ্মৰত নাৰী শ্ৰমিকৰ অধিকাৰ আদায়ৰ সংগ্ৰামৰ এক সুদীৰ্ঘ ইতিহাস জড়িত হৈ আছে৷

  “জ্জ্ব মাৰ্চ আন্তৰ্জাতিক নাৰী দিবস “ এটা সাধাৰণ অৰ্থত “দিবস“ পালন কৰা দিন নহয়– ইয়াৰ লগত জড়িত আছে নাৰী সংগ্ৰামৰ এক গৌৰৱোজ্জ্বল ইতিহাস৷ ৮ মাৰ্চে এই ইতিহাস সোঁৱৰাই নাৰী অধিকাৰ ৰক্ষাৰ যুঁজখন তীব্ৰতৰ কৰি আগুৱাই লৈ যাবলৈ প্ৰেৰণা যোগায়৷

   সকলো সংগ্ৰামৰ দৰে নাৰীৰ সমনাধিকাৰ প্ৰতিষ্ঠাৰ যুঁজখনো এক ধাৰাবাহিক প্ৰক্ৰিয়া৷ ঊনবিংশ শতিকাত ইউৰোপত শিল্প বিপ্লৱৰ সূচনা হোৱাৰ লগে লগে ভালেমান উদ্যোগ স্থাপিত হয়৷ উদ্যোগসমূহত প্ৰয়োজনীয় শ্ৰমিকৰ অভাৱ পুৰুষ শ্ৰমিকৰে পূৰণ নোহোৱাত মহিলা শ্ৰমিককো উদ্যোগৰ উৎপাদন প্ৰক্ৰিয়াত জড়িত কৰা হয়৷ ফলত ভালেমান মহিলাই ঘৰৰ চাৰিবেৰৰ বাহিৰ হৈ অৰ্থ উপাৰ্জনৰ সুযোগ লাভ কৰিলে যদিও মহিলা শ্ৰমিকসকলে সমনাধিকাৰৰ পৰা বঞ্চিত হৈছিল৷ সেয়ে ১৮৫৭ খ্ৰীষ্টাব্দৰ ৮ মাৰ্চত নিউয়ৰ্কৰ কপাহী কাপোৰৰ কাৰখানাবোৰত কাম কৰা মহিলা শ্ৰমিকসকলে মজুৰিৰ বৈষম্য, কৰ্মৰ নিদিষ্ট সময়সূচী, কৰ্মক্ষেত্ৰসমূহৰ অস্বাস্থ্যকৰ আৰু অমানৱীয় পৰিৱেশ আদিৰ বিৰুদ্ধে মাৰ্কিন যুক্তৰাষ্ট্ৰৰ নিউয়ৰ্ক চহৰৰ ৰাস্তাত নামি প্ৰতিবাদ সাব্যস্ত কৰিছিল৷ আৰু চৰকাৰী পুলিচ বাহিনীয়ে আন্দোলনকাৰী মহিলাসকলক কঠোৰভাৱে দমন কৰিছিল৷ ১৮৬০ খ্ৰীষ্টাব্দত এই কাৰখানাৰ মহিলাসকলে “মহিলা শ্ৰমিক ইউনিয়ন’’ গঠন কৰি তেওঁলোকৰ আন্দোলন চলাই গৈছিল৷

  বিশ্ববিশ্ৰুত দাৰ্শনিক কাৰ্লমাক্সেই সৰ্বপ্ৰথমে এক আন্তৰ্জাতিক পুৰুষ শ্ৰমিক সন্মিলনত নাৰী–পুৰুষৰ সম অধিকাৰৰ বিষয়টো উত্থাপন কৰিছিল৷ পৰৱৰ্তী সময়ত আন এখন আন্তৰ্জাতিক শ্ৰমিক সন্মিলনত বিশ্ববৰেণ্য নেত্ৰী ক্লাৰা জেটকিঙে নাৰী–পুৰুষৰ সম অধিকাৰৰ দাবী সজোৰে উত্থাপন কৰিছিল৷ ক্লাৰা আছিল এগৰাকী জাৰ্মান ৰাজনীতিবিদ আৰু জাৰ্মান কমিউনিষ্ট পাৰ্টিৰ প্ৰতিষ্ঠাপক নেত্ৰী৷ ১৯০৮ চনত নিউয়ৰ্কৰ ছোচিয়েল ডেমোক্ৰেটিক নাৰী সংগঠনৰ দ্বাৰা আয়োজিত নাৰী সমাৱেশত জাৰ্মান গণতান্ত্ৰিক নেত্ৰী ক্লাৰা জেটকিঙৰ নেতৃত্বত সৰ্বপ্ৰথম আন্তৰ্জাতিক নাৰী সন্মিলন উদ্‌যাপিত হয়৷ এই সমাৱেশত নাৰীৰ ভোটৰ অধিকাৰ, নাৰীৰ কৰ্মৰ নিদিষ্ট সময় সূচী নিৰ্ধাৰণ আৰু মজুৰী বৃদ্ধিৰ দাবী তুলি মহিলাসকলৰ এক ৰেলী উলিয়াই ধৰ্মঘট আৰম্ভ কৰে৷ এই ঘটনাক স্মৰণ কৰি ১৯০৯ চনত “Socialist Party of America’’ ই ২৮ ফেব্ৰুৱাৰীত নিউয়ৰ্কত “ৰাষ্ট্ৰীয় নাৰী দিৱস“ উদ্‌যাপন কৰিছিল৷ ইয়াৰ পিছত ১৯১০ চনত ডেনমাৰ্কৰ কোপেনহেগেন চহৰত দ্বিতীয়খন আন্তৰ্জাতিক সাম্যবাদী নাৰী সন্মিলন অনুষ্ঠিত হয়৷ ইয়াত ১৭খন দেশৰ ১০০ গৰাকী মহিলা প্ৰতিনিধিয়ে যোগদান কৰে৷ এই সন্মিলনতে ক্লাৰাই প্ৰতিবছৰে ৮ মাৰ্চত নাৰী দিৱস পালন কৰিবলৈ এক প্ৰস্তাৱ আগবঢ়ায় আৰু সন্মিলনে সিদ্ধান্ত গ্ৰহণ কৰে৷ সেই সিদ্ধান্তমৰ্মে ১৯১১ চনৰ পৰা ৮ মাৰ্চৰ দিনটো নাৰীৰ সম অধিকাৰ দিৱসৰূপে পালন হৈ আহিছে৷ এই দিৱসটো পালন কৰিবলৈ বহুতো দেশৰ সমাজবাদী লোকসকল আগবাঢ়ি আহে৷