নাৰীবাদ বনাম কৃত্ৰিম নাৰীবাদ(ভণিতা দেৱী)

এই বিকৃত নাৰীবাদৰ ধাৰণাৰ সৃষ্টিৰ কাৰণৰ বিষয়ে বিশ্লেষণ কৰিলে দেখা যায় যে, ইয়াৰ বাবে কম – বেছি পৰিমাণে পুৰুষতান্ত্ৰিক সমাজখনেই জগৰীয়া৷ পুৰুষপ্ৰধান সমাজ ব্যৱস্থাত মহিলাৰ ওপৰত চলা শোষণ আৰু নিৰ্যাতনৰ বাবে বহু মহিলা পুৰুষ বিদ্বেষী হৈ উঠে৷ কিছুসংখ্যক মহিলাৰ ওপৰত হোৱা শোষণ প্ৰত্যক্ষ কৰি সমাজৰ আন মহিলাৰ মনতো পুৰুষৰ প্ৰতি এক বিদ্ৰোহী মনোভাৱৰ সৃষ্টি হয়৷ এনে মনোভাৱেই শেষত গৈ এনেকুৱা এক পৰ্যায় পায়গৈ যে, একাংশ মহিলাই নাৰীক উচ্চ আসনত ৰাখিব বিচাৰে নাইবা সকলোতে নাৰীৰ শাসন বিচাৰে৷ এচাম পুৰুষে নাৰীৰ ওপৰত চলোৱা শাৰীৰিক – মানসিক নিৰ্যাতন, নাৰীক উপভোগ্য সামগ্ৰীৰূপে ব্যৱহাৰ কৰা বা কৰিব বিচৰা মানসিকতা, নাৰীৰ প্ৰতি ব্যৱহাৰ কৰা অপমানসূচক মন্তব্য, নাৰীক নিজৰ অধীনৰূপে ৰাখিব বিচৰা মানসিকতা আদিবোৰৰ বাবে কিছুমান নাৰী ইমানেই পুৰুষবিদ্বেষী হৈ উঠে যে,  দুই –এজন বেয়া পুৰুষৰ বাবে গোটেই পুৰুষ জাতিটোকেই বেয়া বুলি ভাবিবলৈ লয় আৰু এক দমনমূলক মনোভাৱ গঢ় লৈ উঠে৷ কিন্তু এনে ধাৰণাও গ্ৰহণযোগ্য নহয়৷ এনে ধাৰণাই সমাজত বিশৃংখলতাৰ সৃষ্টি কৰাৰ সম্ভাৱনা থাকে৷ তদুপৰি এইবোৰ ধাৰণা নিজৰ লগতে সমাজখনৰ বাবেও বিপদজনক৷ নাৰী–পুৰুষ ভিন্ন হৈ কেতিয়াও চলিব নোৱাৰে৷ এটা আনটোৰ সদায় পৰিপূৰক৷ সকলোফালে অকল নাৰীৰ শাসন বিচৰা বা পুৰুষক দমন কৰিব বিচৰা মানে এগৰাকী নাৰীয়ে নিজৰ পিতৃকো অপমান কৰা যেন হয়৷ অকল নাৰীয়েই যে সদায় শোষিত হৈ আহিছে, তেনেও নহয়৷ বহু সময়ত পুৰুষো নাৰীৰ হাতত শোষিত হোৱা দেখিবলৈ পোৱা যায়৷ কেতিয়াবা কোনো নাৰীৰ ব্যক্তিগত স্বাৰ্থ সিদ্ধি নহ’লে অথবা কিবা জেদ ভাবৰ বাবে বা আন কিবা কাৰণৰ বাবেই হওক পুৰুষৰো শোষণ হোৱা দেখিবলৈ পোৱা যায়৷ কিন্তু এই শোষণ বহু সময়ত মানসিক হয়৷ কেতিয়াবা এজন পুৰুষ শোষণৰ সন্মুখীন হ’লেও ভুক্তভোগী পুৰুষজনে সন্মান হানিৰ ভয়ত মাত মাতিব নোৱাৰে বা কেতিয়াবা মাত মাতিলেও বিপৰীত পক্ষৰ মহিলাই নাৰীবাদৰ ৰূপত বিকৃত নাৰীবাদী ৰূপে থিয় দিয়ে৷ এনে বিকৃত নাৰীবাদীসকল নিজৰ পৰিয়ালৰ লগতে সমাজখনৰ বাবেও বিপদজনক৷

   সাম্প্ৰতিক সময়ত নাৰী উন্নয়নৰ চৰম শিখৰত আৰোহণ কৰিবলৈ সক্ষম হৈছে যদিও আজিও নাৰীজনিত অপৰাধ কিন্তু নোহোৱা হোৱা নাই৷ দৈনিক বহু মহিলা শাৰীৰিক–মানসিক নিৰ্যাতনৰ বলি হৈ আহিছে৷ নাৰীবাদে নাৰীক শোষণৰ পৰা মুক্ত কৰাৰ লগতে নাৰী–পুৰুষ দুয়োটা লিংগৰেই সম–অধিকাৰক সমৰ্থন কৰে৷  বিকৃত নাৰীবাদৰ ক্ষেত্ৰত এক বিপৰীত ছবি দেখিবলৈ পোৱা যায়৷ বিকৃত নাৰীবাদী চিন্তাধাৰাৰ পৰা নাৰীৰ কোনো সমস্যাৰেই সমাধান নহয়৷ কেতিয়াবা নাৰী স্বাধীনতাৰ নামতো কিছুমান বিকৃত নাৰীবাদী ওলাই আহে,  যাৰ ফলত নাৰীবাদৰ প্ৰতি মানুহৰ মনত এক ভ্ৰান্ত ধাৰণা গঢ় লৈ উঠে৷ কেতিয়াবা কিছুমান পৰিৱেশত কোনো পুৰুষ আৰু মহিলাৰ মাজত হোৱা ভুল বুজা–বুজিয়েও শেষত গৈ বিকৃত নাৰীবাদৰ ৰূপ লয়৷ নাৰীৰ উত্তৰণৰ ক্ষেত্ৰত বিকৃত নাৰীবাদৰ কোনো অৰিহণা নাথাকে৷ বৰং ই সমাজখনৰ বাবে বিপদজনকহে৷ কিন্তু নাৰীবাদক বা নাৰীবাদী পুৰুষ অথবা মহিলাক নাৰীৰ হকে মাত মাতিলেই এচাম মানুহে বিকৃত নাৰীবাদী বুলি উপলুঙা কৰিব খোজাটোও সমৰ্থন যোগ্য নহয়৷ এনে কাৰ্যই নাৰীৰ উন্নতিৰ ক্ষেত্ৰতহে বাধা প্ৰদান কৰে৷ অন্যায়ৰ বিৰুদ্ধে সকলোৱে মাত মাতিলে আৰু জনমত গঠন হ’লেহে সমাজত অপৰাধমূলক কাৰ্য – কলাপসমূহ হ্ৰাস পাব৷ পুৰুষে নাৰীক অথবা নাৰীয়ে পুৰুষক হেয় প্ৰতিপন্ন কৰিবলৈ বিচৰাটোও খুবেই দুৰ্ভাগ্যজনক৷

   পুৰুষ – নাৰী সকলোৰে মাজত সহায়–সহযোগিতা আৰু সন্মান থাকিলে নাৰীজনিত বহু সমস্যাৰেই সমাধান হ’ব৷ তদুপৰি নাৰীক উপভোগ্য সামগ্ৰীৰূপে ভৱা এচাম লোকৰ নাৰীৰ প্ৰতি থকা মানসিকতাও সলনি হ’ব লাগিব৷ তদুপৰি শিক্ষা সকলোৰে বাবে খুবেই প্ৰয়োজনীয়৷ নাৰীৰ বিকাশৰ লগত ৰাষ্ট্ৰৰ বিকাশো জড়িত হৈ থাকে৷ নাৰীজনিত সমস্যাসমূহ আমাৰ সমাজৰ বাবে এক গুৰুত্বপূৰ্ণ বিষয়৷ নাৰীৰ সৱলীকৰণৰ বাবে চৰকাৰ তথা প্ৰশাসনেও যথেষ্ট গুৰুত্ব আৰোপ কৰি আহিছে৷ নাৰীৰ বাবে থকা সা – সুবিধা সমূহ যাতে সকলো নাৰীয়ে পাব পাৰে আৰু কোনো সুবিধা বা আইনৰ অপব্যৱহাৰ নহয়, সেয়াও লক্ষণীয় বিষয়৷