চুটি গল্প

আন দিনাৰ দৰে আজিও ক্লাছ ছুটি হোৱাৰ পিছতে ৰমেন আৰু নলীন দুয়ো বন্ধু ওলাই গ’ল খেলিবলৈ৷ সিহঁত দুজনৰ পঢ়া কলেজৰ হোষ্টেলৰ কাষতে লাগি আছে ষ্টেডিয়ামখন৷ গতিকে ক্লাছ ছুটি হোৱাৰ পিছতে দুয়োজন খেলাত লাগি যায়৷ ৰমেন আৰু নলীন দুয়োজনে মেট্ৰিক পাছ কৰি এই মহানগৰীৰ স্বনামধন্য কলেজখনত এডমিছন লৈছে৷ দুয়োৰে একেই ক্লাছ, একে হোষ্টেল, আৰু হবিও একে৷ সেয়েহে হোষ্টেলত একাদশ শ্ৰেণীত এডমিছন লোৱাৰ পিছতে দুয়োৰে মাজত বন্ধুত্ব গঢ়ি উঠিছে৷ মেট্ৰিকৰ ৰিজাল্টো দুয়োৰে প্ৰায় সমান৷ দুয়োজনে ফুটবল খেলি ভাল পায়৷ ৰমেনে চেণ্টাৰ ফৰোৱাৰ্ডত খেলে আৰু নলীন চেণ্টাৰ বেকত৷

একাদশ শ্ৰেণীত পঢ়িবলৈ অহা আৰু খেলত ৰুচি থকা ছাত্ৰ দুজনক পাই কলেজৰ ক্ৰীড়া শিক্ষক বৰকটকী ছাৰ খুব সুখী৷ ৰমেনৰ দ্বিবলিং কৌশল দেখি বৰকটকী ছাৰে বৰ ভাল পালে৷ সেয়েহে তেওঁ কলেজৰ ফুটবল দলটো নতুনকৈ গঢ়াৰ কথা চিন্তা কৰিবলৈ ধৰিলে৷ বৰকটকী ছাৰে কথাটো কলেজৰ অধ্যক্ষ ছাৰক জনালে৷ কলেজৰ অধ্যক্ষ বয়সীয়াল হ’লেও খেলা–ধূলা ভাল পোৱা মানুহ৷ তেখেতে ত্ৰীড়া শিক্ষক বৰকটকী ছাৰক একে আষাৰে উদগনি জনালে আৰু ক’লে তোমালোকে আগবাঢ়া, ফুটবল দলটো গঠন কৰা, মই তোমালোকৰ লগত আছোঁ৷ অধ্যক্ষ ছাৰৰ আশীৰ্বাদ লৈ বৰকটকী ছাৰ নতুন উদ্যমেৰে দল গঠনত লাগি পৰিল৷

অধ্যক্ষ ছাৰৰ ইচ্ছাতে কলেজত বহু বছৰৰ বিৰতিৰ পিছত ইণ্টাৰ ক্লাছ ফুটবল টূৰ্ণামেণ্ট এখনো আৰম্ভ হ’ল৷ ফাইনেলত একাদশ কলা শ্ৰেণী আৰু বি.এ দ্বিতীয় বৰ্ষৰ মাজত যুঁজ আৰম্ভ হ’ল৷ দৰ্শকৰ শাৰীত অধ্যক্ষ ছাৰ, বৰকটকী ছাৰ আৰু বহুকেইজন প্ৰফেচাৰ৷ তাৰ ভিতৰত মহিলা প্ৰফেচাৰ নতূনকৈ সোমোৱা ইংৰাজীৰ ভৰালী মেডাম৷ ভৰালী মেডামে একাদশ শ্ৰেণীক পূৰ্ণ সমৰ্থন আগবঢ়ালে৷ ৰমেনৰ কলা–কৌশল আৰু নলীনৰ ৰক্ষণ বিভাগৰ দক্ষতাৰ বাবে একাদশ শ্ৰেণী ৰ–ঙ্ম গ’লৰ ব্যৱধানত ইণ্টাৰ ক্লাছ ফুটবল টূৰ্ণামেণ্টত বিজয়ী হ’ল৷

   একাদশ শ্ৰেণীৰ এই বিজত কলেজখনত ৰমেন আৰু নলীনৰ পৰিচয় প্ৰকাশ হ’ল৷ লগতে আমাৰ সমাজ জীৱনৰ পৰা জনপ্ৰিয়তা হেৰুৱাবলৈ ধৰা ফুটবল খেলটোও কলেজখনত আপোন হৈ গ’ল৷ 

একাদশ শ্ৰেণীৰ ইংৰাজীৰ ক্লাছত ভৰালী মেডামে একাদশ শ্ৰেণীয়ে ইণ্টাৰ ক্লাছ ফুটবল টূৰ্ণামেণ্টত চেম্পিয়ন হোৱাৰ বাবে গোটেই ক্লাছটোকেই অভিনন্দন জনাই গ’ল৷ লগতে খেলা–ধূলাৰ সমানে সমানে পঢ়া–শুনাৰ প্ৰতিও যাতে আগ্ৰহ থাকে তাকো সকিয়াই থৈ গ’ল৷

ক্ৰীড়া শিক্ষক বৰকটকী ছাৰে অধ্যক্ষ ছাৰ আৰু কলেজ শিক্ষকৰ মিটিঙৰ মাজতে প্ৰস্তাব আগবঢ়ালে যে এই বছৰৰ গুৱাহাটী চিনিয়ৰ ডিভিজন লীগত তেওঁ কলেজৰ টীম দিব খোজে৷ ভৰালী মেডামে লগে লগে প্ৰস্তাবটো সমৰ্থন কৰিলে৷ ডেকা বয়সৰ প্ৰফেচাৰ কেইজনেও প্ৰস্তাবটোত হয়ভৰ দিলে৷ অধ্যক্ষ ছাৰে সকলোৰে উৎসাহ দেখি প্ৰস্তাবত সন্মতি জনালে যদিও ক’লে যদিহে বৰকটকীয়ে ভাল দল এটা গঠন কৰিব পাৰে তেতিয়াহে মই সকলো প্ৰকাৰে সহায় আগবঢ়াম৷ গোটেই কেইজন প্ৰফেচাৰে হাত–চাপৰি বজাই বৰকটকী ছাৰক ওলগ জনালে আৰু অধ্যক্ষ ছাৰক ধন্যবাদ জনালে৷

বৰকটকী ছাৰ ডেকা মানুহ, অতি উৎসাহী৷ কিবা এটা নতুন কৰাৰ বাবে আগ্ৰহী৷ তেখেতৰ বন্ধু এই কলেজৰে কেমিষ্ট্ৰীৰ প্ৰফেচাৰ দিগন্ত নাথ ইভেণ্ট মেনেজমেণ্টত সিদ্ধহস্ত৷ দিগন্ত নাথেও বৰকটকী ছাৰক সহায় কৰিবলৈ প্ৰস্তুত হ’ল৷ অবশেষত বৰকটকী ছাৰৰ তত্বাৱধানত কলেজৰ চূড়ান্ত পোন্ধৰজনীয়া দলটো গঠন হ’ল৷ ৰাজেন বড়া, কমল বড়া, বলীন সিংহ, ধীৰাজ কুমাৰ, উত্তম ৰায়, বসন্ত পাটগিৰি, আলতাফ, ৰকছেদ, বলবন্ত্‌ সিং আদিকে ধৰি গ’লকীপাৰৰ বাবে সুভাষ দেব, নকলেও হ’ব ৰমেন আৰু নলীন দলটোৰ আগশাৰীৰ খেলুৱৈ হিচাবে, দলটোৰ সম্পদ হিচাবে চিহ্নিত হৈছে৷ সুভাষ দেব বি, এচ, চি দ্বিতীয় বৰ্ষৰ ছাত্ৰ৷ অতি কম সময়তে বৰকটকী ছাৰ আৰু দিগন্ত নাথ ছাৰৰ পৰা গ’ল কিপীঙৰ কলাসমূহ আয়ত্ব কৰিব পাৰিছে৷ গোটেই দলটোৰ অনুশীলন ছিডিউল এখন দিগন্ত ছাৰে জাৰী কৰি দিলে আৰু আৰম্ভ হ’ল অনুশীলন৷ সদাই আবেলি ৩ বজাৰ পৰা ৫ বজালৈ৷ দিগন্ত ছাৰৰ মতে তেওঁক কমেও এমাহ সময়ৰ প্ৰয়োজন গোটেই দলটোৰ টিম–মেটৰ কেমিষ্ট্ৰী মিলাবলৈ৷

গুৱাহাটী চিনিয়ৰ ডিভিজন লীগৰ প্ৰথমখন খেল হ’ল চন্দ্ৰপুৰ একাদশ আৰু ৰমেন–নলীনৰ কলেজৰ মাজত৷ আশাকৰা মতেই চন্দ্ৰপুৰ একাদশ পৰাস্ত হ’ল ২–ৰ গ’লৰ ব্যৱধানত৷ দুয়োটা গ’লতে ৰমেনৰ পৰা বনাই দিয়া পাছৰ সম্পূৰ্ণ সদ্‌ ব্যৱহাৰ কৰি কমল বড়া আৰু ৰকছেদে দুয়োজনে এটাকৈ গ’ল দিয়ে৷ চিনিয়ৰ ডিভিজন লীগৰ ছেকেণ্ড ৰাউন্দ নক–আউট ৰাউন্দ৷ অহা সপ্তাহৰ পৰা৷ গতিকে টূৰ্ণামেণ্টত টিকি থাকিবলৈ জয়ী হ’বই লাগিব৷ ৰমেন–নলীনহঁতে তাকেই চিন্তা কৰি থাকোঁতেই অৱশেষত বেয়া খবৰটো আহিল যে নক–আউট ৰাউণ্ডৰ প্ৰথমখন খেল হ’ব আমাৰ কলেজ আৰু যোৱা বাৰৰ ৰানাৰ্ছআপ টাউন ক্লাবৰ মাজত৷ টাউন ক্লাব যোৱা–বাৰৰ টূৰ্ণামেণ্টৰ এটা দুৰ্ধোৰ্ষ দল৷ কথাটো ৰাতি সিহঁতৰ হোষ্টেলত আটাইতকৈ চিনিয়ৰ ছাত্ৰ প্ৰদীপদাই যেন সাৱধান কৰি শুনাই দিলে৷ কথাটো শুনি হোষ্টেলৰ আটাইৰে মুখৰ মাত হেৰাল৷ সিহঁতে যে নিজৰ দলৰ শুভ চিন্তা কৰে৷

পিছদিনা দিগন্ত ছাৰে গোটেই পৰিৱেশটোকে সলনি কৰি দিলে৷ ল’ৰাহঁতৰ লগত তেওঁ নিজে প্ৰেকটিছত নামি পৰিল৷ তেওঁ ক’লে যে প্ৰতিপক্ষ যিমানে শক্তিশালী হয়, সিমানে তেওঁলোকে ভাল খেল খেলিব পাৰিম৷ দিগন্ত ছাৰ আৰু বৰকটকী ছাৰে গোটেই দলটোৰ লগত আলোচনা কৰি ৰণ–নীতি এটা তৈয়াৰ কৰি পেলালে৷ দলটোলৈ আত্ম–বিশ্বাস ঘূৰি আহিল৷