মৌলবাদ নিপাত যাওক(নাছিৰ আহমেদ)

বৰ্তমান বাংলাদেশৰ দ্ৰুত গতিত পৰিৱৰ্তন হোৱা ৰাজনৈতিক ঘটনা–পৰিঘটনাই বাংলাদেশত যেন এক নতুন পটভূমি গঢ়ি উঠাৰ লক্ষণ সুস্পষ্ট কৰিছে৷ উপনিৱেশবাদী পাকিস্তানৰ সামৰিক শাসন ব্যৱস্থাত অতিষ্ঠ হৈ বাংলাদেশৰ (পূৰ্বৱৰ্তী পূব পাকিস্তান) কোটি কোটি জনতাই এদিন ৰাজপথলৈ ওলাই আহি বঙ্গবন্ধু শ্বেখ মুজিবৰ ৰহমানৰ নেতৃত্বত ১৯৭১ চনৰ ২৬ মাৰ্চত স্বাধীন সাৰ্বভৌম গণতান্ত্ৰিক ধৰ্মনিৰপেক্ষ বাংলাদেশ ঘোষণা কৰিছিল৷ পাকিস্তানৰ সামৰিক বাহিনীৰ বৰ্বৰোচিত আক্ৰমণৰ সন্মুখীন হৈ ১৯৫২ চনৰ ২১ ফেব্ৰুৱাৰীৰ ভাষা আন্দোলনৰ পৰা আৰম্ভ কৰি ১৯৭১ চনলৈকে বাংলাদেশৰ লাখ লাখ মানুহৰ আত্মত্যাগ আৰু এসাগৰ তেজৰ বিনিময়ত অৱশেষত এই দেশে স্বাধীনতা লাভ কৰিবলৈ সক্ষম হৈছিল৷

এতিয়া আকৌ বাংলাদেশত দ্ৰুত গতিত ৰাজনৈতিক পৰিৱৰ্তনৰ পৰিৱেশৰ যেন অভ্যুত্থান ঘটিছে৷ ২০০৯ চনৰ পৰা ২০২৪ চনলৈকে অতি স্বৈৰাচাৰী শাসন ব্যৱস্থা চলাই যোৱা শ্বেখ হাছিনাৰ “অযৌক্তিক সংৰক্ষণ’’ নীতিৰ বিৰুদ্ধে ঐক্যমত হৈ ব্যাপক ছাত্ৰ আন্দোলনৰ ওচৰত মূৰ দোঁৱাই শ্বেখ হাছিনাই পাঁচ আগষ্টত পদত্যাগ কৰি বাংলাদেশৰ পৰা প্ৰাণৰ ভয়ত ভাৰতলৈ পলাই অহাৰ পাছত বাংলাদেশত আন্দোলনৰ গতি বেলেগ ফালে ঢাপলি মেলিছে৷ এতিয়া বাংলাদেশত আগৰে পৰা সুপ্ত হৈ থকা ৰক্ষণশীল ৰাজাকাৰ বাহিনী,  উগ্ৰ ইছলামিক সাম্প্ৰদায়িক সংগঠনসমূহ আৰু পাকিস্তানপন্থী দল সংগঠনসমূহে পুনৰ সক্ৰিয় হৈ পৰিছে৷ এই ক্ষেত্ৰত সম্পূৰ্ণ সহযোগিতা আগবঢ়াইছে পাকিস্তানৰ আই এছ আইৰ এজেণ্টসকলে৷ এই গণতান্ত্ৰিক, ধৰ্ম–নিৰপেক্ষ, বাঙালী জাতীয়তাবাদী চিন্তাধাৰা বিৰোধী উগ্ৰ ইছলামিক সাম্প্ৰদায়িক সংগঠনসমূহে পুনৰাই বাংলাদেশক এখন ইছলামিক ৰাষ্ট্ৰ হিচাপে পুনৰ প্ৰতিষ্ঠা কৰিবলৈ উঠি পৰি লাগিছে৷ তেওঁলোকে বাংলাদেশৰ জাতীয় সংগীত আৰু জাতীয় পতাকাক নস্যাৎ কৰি নতুনকৈ জাতীয় সংগীত আৰু জাতীয় পতাকা নিৰ্মাণ কৰিব বিচাৰিছে৷ তেওঁলোকৰ মতে ১৯০৫ চনতেই ৰবীন্দ্ৰনাথ ঠাকুৰে ৰচনা কৰা সংগীতটি কেতিয়াও বাংলাদেশৰ জাতীয় সংগীত আৰু আগতে নিৰ্মাণ কৰা জাতীয় পতাকা বাংলাদেশৰ জাতীয় পতাকা হ’ব নোৱাৰে; কাৰণ এই সংগীতটিত বাংলাদেশৰ নাম উল্লেখ নাই বা স্ৰষ্টাৰ প্ৰতি কোনো শ্ৰদ্ধা নিবেদন কৰা হোৱা নাই৷ অথচ এই জাতীয় সংগীত গাই গাই বাংলাদেশৰ মুক্তি বাহিনীয়ে পশ্চিম পাকিস্তানৰ সামৰিক বাহিনীৰ বৰ্বৰোচিত আক্ৰমণৰ সন্মুখীন হৈ উচিত প্ৰত্যুত্তৰ দিছিল বা জাতীয় পতাকা হাতত লৈ গণ–মিছিল গণ–সমাৱেশ, পিকেটিং, ৰেলি, ধৰ্ণা, হৰতাল আৰু সৰ্বাত্মক বন্ধ পালনৰ জৰিয়তে পাকিস্তানী সৈন্য বাহিনীক পৰাভূত কৰিবলৈ সক্ষম হৈছিল৷ এই জাতীয় সংগীত আৰু জাতীয় পতাকাই হ’ল বাংলাদেশৰ কোটি কোটি জনতাৰ প্ৰেৰণাৰ মূল উৎস৷ অজুহাত যিয়েই নেদেখুৱাওক এই পাকিস্তানপন্থী দল–সংগঠনসমূহে বাংলাদেশৰ বাঙালী ভাৱাবেগ থকা জাতীয় ভাৱধাৰাক ধ্বংস কৰাৰ এয়া এক ষড়যন্ত্ৰৰ এটি অংশহে৷ গণ–আন্দোলন চলি থকাৰ সময়ত বঙ্গবন্ধু শ্বেখ মুজিবৰ ৰহমানৰ ষ্টেচু (মূৰ্তি) আৰু বাংলাদেশৰ স্বাধীনতা আন্দোলনৰ মুক্তি বাহিনীৰ স্মৃতি সংৰক্ষণ কৰা গণভৱন ধ্বংস কৰা কাৰ্যই এই কথাৰ প্ৰমাণ দিয়ে৷ এই সাম্প্ৰদায়িক মৌলবাদীৰ ষড়যন্ত্ৰৰ বলি হৈ শ্বেখ হাছিনাৰ অতি স্বৈৰাচাৰী শাসন কাৰ্য আৰু সংৰক্ষণ বিৰোধী আন্দোলনৰ নেতাসকলে বাংলাদেশৰ স্বাধীনতা আন্দোলনৰ বিৰোধিতা কৰা ছাত্ৰ আন্দোলনৰ নেতাসকলে বাংলাদেশৰ স্বাধীনতা আন্দোলনৰ সময়ত পাকিস্তানৰ পক্ষ লৈ পাকিস্তানপন্থী ৰাজাকাৰ বাহিনীৰ কু–কৰ্মৰ কথা পাহৰি গৈ শ্বেখ হাছিনাৰ নেতৃত্বাধীন আৱামী লীগক বিৰোধিতা কৰাৰ নামত নিজকে উগ্ৰ ইছলামিক সাম্প্ৰদায়িক ৰাজাকাৰ বুলি গৌৰৱেৰে আত্ম পৰিচয় দি ঘোষণা কৰা কাৰ্য এক আত্মঘাতী কাৰ্যৰ নামান্তৰ হৈ পৰিছে৷