হে বন্ধু/
প্ৰতিযোগিতাৰ উত্তাল তৰংগত
উটি-ভাহি গৈছা নেকি?
প্ৰতিযোগিতাৰ বা-মাৰলীত
বিচ্ছুৰিত হৈছা নেকি
আপোন পৃথিৱীৰ পৰা?
ক্ষন্তেক পিছলৈ চোৱা
আত্মাই হাত বাউলি দিছে
আকুলতাৰে….
হৃদয়ৰ স্বৰ্গখনে
বাট চাইছে
একাঁজলি হেঁপাহেৰে/
প্ৰতিযোগিতাৰ ৰণাংগনত
দৌৰি দৌৰি
তুমি হয়তো এদিন আকাশ চুবাগৈ
নতুবা
সাত-সাগৰ তেৰ নদীৰ
সিপাৰ পাবাগৈ/
হে বন্ধু/
জানানে
ক্ষণভংগুৰ জীৱনত
দিন-ৰাতিৰ প্ৰহেলিকাত
সময় উভতি নাহে/
প্ৰতিযোগিতাৰ জোঁৱাৰে
তোমাক নি:স্ব কৰিব
কণ কণ হাঁহিৰ
জোনাকী আৱেশৰ পৰা…
প্ৰতিযোগিতাই তোমাক
বঞ্চিত কৰিব
মৰতৰ সৰগীয় সুখৰ পৰা/
হে বন্ধু/
প্ৰতিযোগিতাক এলাগি কৰি
সময়ক আঁকোৱালি লোৱা
দুহাতে সাৱটি….
তেহে পাবা জীৱনৰ আচল সঞ্জীৱনী/
