সময় (প্ৰশান্ত সাগৰ চাংমাই)

বছৰৰ শেষৰ দিনত

আৰম্ভ হয় নতুন বছৰৰ দিন৷

প্ৰতিপল জীৱনৰ

হয়গৈ

অতীতৰ ৰং৷

এটা এটা বছৰ কোনফালেদি সৰকি যায়?

একেবাৰে হাড়ৰ মাজদি হয়তো/

চুলিবোৰৰ ওপৰেদি

ছালবোৰত ৰৈ যায় নেকি

তাৰ অলপ আঁচোৰ?

দাঁতবোৰৰ গুৰিত পৰি ৰয় নেকি

বহাগৰ কুঁহিপাতৰ সুবাস?

কোনফালেদি গুচি যায় বছৰটো?

মইটো একেখন চকীতেই বহি আছো

ৰ’দ সেকি সেকি৷

চকীখন অলপ পুৰণি হৈ পৰিল নেকি?

চকীখনৰ লগত ময়ো হৈ পৰিলো নেকি অলপ পুৰণি?

লৰিছে নেকি মোৰ হাড়ৰ গাঁঠি

লৰিছে নেকি চকীখনৰ খুটি

ৰ’দৰ উদৰতেই

ৰ’দৰ পিতৃ

সূৰ্য

অবিনাশী৷