দৌল উৎসৱ(কৰবী বৰ্মন কলিতা)

ফাগুন–চ’ত মাহ৷ ধূলিয়ে সেউজত আবিৰ সানে৷ মদৰুৱা পাতবোৰ সৰিবলৈ লয়৷ কুঁহিপাতক বাট এৰে৷ এনে এক সুন্দৰ সময়ত মানুহে পালন কৰে ৰঙৰ উৎসৱ৷ ৰঙা, হালধীয়া, সেউজীয়া, গুলপীয়া আবিৰে বতাহ ৰঙীন কৰি তোলে৷

ৰঙৰ আবিৰ গাত সানিয়েইতো ফাগুন আহে৷ কঢ়িয়াই আনে এমোকোৰা আনন্দ৷ ধৰাৰ বুকুত ৰাই–জাই লগাই মন৷ সকলো ফালে হয় মাথোঁ আশাৰ সঞ্চাৰ৷

ফাগুনৰ মাহৰ পূৰ্ণিমা তিথিত দেশজুৰি পালিত হোৱা এই ফাঁকুৱা বা হোলীক লৈ এতিয়া সকলোতে উখল–মাখল পৰিৱেশ৷

হোলী বা ফাকুৱাক ফল্গুৎসৱ বুলিও জনা যায়৷ ফাগুন মাহৰ পূৰ্ণিমা তিথিত এই উৎসৱৰ আয়োজন কৰা হয় বাবেই এই নাম৷ ফাকুৱাক দৌলোৎসৱ, ফাগুৱা, ফাঁকু, মদনোৎসৱ আদি নামেৰেও জনা যায়৷ সমগ্ৰ ভাৰতবৰ্ষতে হিন্দুসকলৰ প্ৰাচীনতম উৎসৱসমূহৰ ভিতৰত ফল্গুৎসৱ ফাগুন বা চ’ত মাহৰ পূৰ্ণিমা তিথিত পালন কৰা হয়৷ এই উৎসৱ প্ৰাচীন মদন পূজাৰ এক আনুষংগিক উৎসৱ৷ হিন্দুসকলৰ আৰাধ্য দেৱতা শ্ৰীকৃষ্ণ বা বিষ্ণুৰ উদ্দেশ্য কৰি পালন কৰা হয় এই উৎসৱ৷

  ফাঁকুৱা বৰপেটাৰ এক প্ৰাণৰ উৎসৱ৷ জীৱনৰ সকলো সুখ–দুখ পাহৰি কেৱল কৃষ্ণভক্তি আৰু ৰঙেৰে ৰঙিয়াল হৈ উঠে সকলো৷

শ্ৰীমন্ত শংকৰদেৱৰ মহৎ সৃষ্টি চিহ্নযাত্ৰাৰ সমাপ্তিত এই দৌল উৎসৱ গুৰুজনাই শুভাৰম্ভ কৰাৰ লগতে কিছু যুগমীয়া হোলী গীতো ৰচনা কৰিছিল৷

‘ৰঙে ফাগু খেলে চৈতন্য বনমালী৷

দুহাতে ফাগুৰ গোন্ধ সিঞ্চন্ত মুৰাৰি’

নামনি অসমৰ বৰপেটা এখন সংস্কৃতিবান ঠাই৷ মহাপুৰুষ মাধৱদেৱে ১৫০৫ শকাব্দত এই সত্ৰ স্থাপন কৰিছিল৷ মহাপুৰুষ মাধৱদেৱ গণককুছি সত্ৰত ১৮ বছৰ ৬ মাহ আছিল আৰু বৰপেটাৰ সত্ৰৰ নৃত্য, গীত, ভাওনা ইত্যাদিৰ কামসমূহ বৰপেটাৰ কীৰ্তনঘৰত পৰিচালনা কৰিছিল৷ মাধৱদেৱে সত্ৰৰ দায়িত্ব মথুৰা দাস বুঢ়া আতাৰ হাতত অৰ্পণ কৰে৷ বৰপেটাত মথুৰা দাস বুঢ়া আতাই প্ৰথমবাৰৰ বাবে বৈকুণ্ঠৰ আৰ্হিত দৌল উৎসৱ পালন কৰে৷ তেতিয়াৰে পৰা আজিৰ তাৰিখলৈ বৰপেটা সত্ৰত বৃহৎভাৱে দৌল উৎসৱ অনুষ্ঠিত হৈ আহিছে৷ বৰপেটা সত্ৰক দ্বিতীয় বৈকুণ্ঠপুৰীৰুপেও জনা যায়৷

দৌল উৎসৱ ৩–প্ত দিনলৈ পালন কৰা হয়৷ ৰোহিণী নক্ষত্ৰৰ অৱস্থানমৰ্মে প্ৰতি বছৰে দৌল কেই দিনৰ বাবে হ’ব সেয়া নিৰ্ধাৰণ কৰা হয়৷

তিনিদিনীয়া দৌলক বুঢ়া দৌল (চ’ত মাহ) আৰু চাৰি–পাঁচদিনীয়া দৌলক ডেকা দৌল (ফাগুন মাহ) বোলা হয়৷ চাৰি– পাঁচদিনীয়া দৌল উৎসৱ ফাগুন মাহৰ পুৰ্ণিমাত আৰু তিনিদিনীয়া দৌল উৎসৱ চ’ত মাহৰ পুৰ্ণিমাত অনুষ্ঠিত হয়৷ দৌল উৎসৱৰ প্ৰথম দিনাখনক কোৱা হয় গন্ধোৎসৱ বা গন্ধযাত্ৰা৷

দ্বিতীয় দিনাখনক ভৰদৌল আৰু তৃতীয় দিনাখনক–ফাঁকুৱা, সুঁৱেৰি বোলা হয়৷ এই ক্ষেত্ৰত এটা কথা উল্লেখনীয় যে দৌল যদি পাঁচদিনীয়া হয়, তেতিয়া ভৰ দৌল তিনিদিনীয়া আৰু দৌল যদি তিনিদিনীয়া হয়, তেতিয়া ভৰ দৌল এদিনীয়া হয়৷