কুলিৰ কুউ কুউ মাতে
হৃদয়ত শিহঁৰণ জাগে
আমে মলিয়ালে
কঠালে পেলালে মুচি
আই বসুমতী ৰজঃস্বলা এৰি
হৈ পৰিল শুচি৷
গছে গছে মেলিছে
নতুন নতুন কুঁহিপাত
ডেকা–গাভৰুৰ উতলা মন
তত নাইকিয়া হৈছে গাত৷
ফাগুনী বাই আবিৰ ছটিয়াই
ধৰণীৰ গা ৰাঙলী কৰিছে
প্ৰকৃতিয়ে ফাকুৱা খেলিছে
বসন্ত ৰাণীৰ লগত
শিমলু পলাশৰ ৰঙত
ৰাঙলী হৈছে গোটেই জগত৷
প্ৰকৃতিৰ বিনন্দীয়া ৰূপ
মদাৰৰ গোন্ধেৰে হৃদয় আমোলমোল
শেৱালিৰ তলত কথা পাতিছে
যুগল প্ৰেমিকৰ দলে৷
নদীৰ দুয়ো কুল
ফুলিছে কঁহুৱা ফুল
বতাহত হালিছে জালিছে
টুনি–বুলবুলিয়ে উৰুলি মাৰিছে৷
