শীতৰ আগমনত (ঊ কৰবী বৰ্মন কলিতা)
পলমকৈ হ’লেও লাহে লাহে নামিছে শীত৷ ৰাজ্যত দেৰিকৈ হ’লেও ঠাণ্ডা অনুভৱ কৰিবলৈ লৈছে মানুহে৷ প্ৰকৃতিৰ নিয়ম যিহেতু৷ ঋতু পৰিৱৰ্তন হ’বই৷
এইবাৰ অৱশ্যে শীত বহু পলমকৈ আহিছে৷ বায়ু প্ৰদূষণৰ বাবে দায়ী জধে-মধে নিৰ্মাণ কৰা বহু উদ্যোগ, কল-কাৰখানা, যাৰ বাবে গ্ল’বেল ৱাৰ্মিঙৰ সৃষ্টি হৈছে তাৰ বাবেই শীত আজি-কালি অতি পলমকৈ আহে৷ এসময়ত আমিবোৰে দুৰ্গা পূজাৰ সময়ত নতুনকৈ ক্ৰয় কৰা গৰম কাপোৰ অৰ্থাৎ জেকেট-ছুৱেটাৰ পিন্ধি পূজা চাবলৈ গৈছিলো৷ দেৱালীৰ সময়ত ঘৰৰ বাহিৰত বহি ফটকা ফুটাইছিলো৷ তেতিয়া নিয়ৰ পৰা অনুভৱ কৰিছিলো৷ এতিয়া সময়ৰ পৰিৱৰ্তন হৈছে৷ সকলো দিশতে৷ বছৰৰ শেষৰ ভাগলৈহে যেন সম্পূৰ্ণ ৰূপে শীত পৰা পৰিলক্ষিত হ’ব৷ হ’লেও শীতৰ মাদকতা ল’বলৈ যেন সকলো ব্যাকুল৷ শীত তেনেই মোহনীয় ৷ শীত মানেই কুঁৱলি, শীত মানেই শেৱালি৷
ছয়টা ঋতুৰ ভিতৰত বসন্ত আৰু শৰতকে প্ৰশস্ত বুলি ধৰা হয়৷ ঋতুৰাজ যদি বসন্ত, তেন্তে শৰৎ হৈছে শাৰদীয় ঋতুৰাণী৷ বেদনাক্লিষ্...
