হোমেন বৰগোহাঞিৰ ‘হালধীয়া চৰায়ে বাও ধান খায়’উপন্যাসত জনজীৱনৰ চিত্ৰ (দীপাংকৰ গগৈ)
আধুনিক অসমীয়া সাহিত্যত হোমেন বৰগোহাঞি এটা অতিকৈ চিনাকী নাম৷ গদ্য, কবিতা, গল্প, উপন্যাস, অনুবাদ - সকলো দিশতে কলম চলাই সমগ্ৰ অসমীয়া কথা - সাহিত্যক তেওঁ এখন সুকীয়া আসনত প্ৰতিষ্ঠিত কৰাবলৈ সক্ষম হৈছে৷ অফুৰন্ত কল্পনা আৰু উদ্ভাৱনী শক্তিৰে অসমীয়া সাহিত্যক এক নতুন মাত্ৰা প্ৰদান কৰা হোমেন বৰগোহাঞিয়ে তেৰ বছৰ বয়সতে ৰচনা কৰা ৰাণী গাই দিলু নামৰ কবিতাটো মাধৱচন্দ্ৰ বেজবৰুৱা সম্পাদিত বাঁহী আলোচনীত প্ৰকাশ পাইছিল৷ ছপাৰ আখৰত এইটোৱেই তেওঁৰ প্ৰথম ৰচনা৷ৰ এটা গভীৰ অধ্যয়ন পুষ্ট মনৰ অধিকাৰী বৰগোহাঞি সাহিত্যৰ বিভিন্ন শেহতীয়া দৰ্শনৰ লগত বিশেষভাৱে পৰিচিত৷ সমকালীন মানুহৰ সংশয় আৰু দোমোজা, নিসংগ বেদনা, মনৰ ওপৰত চলা চেতনা- অৱচেতনাৰ ক্ৰিয়া আৰু অন্তৰ্দন্দ্ব, চাৰিত্ৰিক সংঘাত আদি তেখেতৰ লেখনিৰ মাজেদি মূৰ্তমান হৈ উঠিছে৷ বিভিন্ন বিষয়বস্তুৰে সাহিত্য ৰচনা কৰাৰ লগতে গ্ৰাম্য জীৱনকো সমল হিচাপে লৈছে৷ তেখেতে যিবোৰ গল্প আৰু উপন্যাস ৰচ...
